الرئيسية / سياسة مصر والعالم / نظام التعليم الجديد و المقاومه للتغيير

نظام التعليم الجديد و المقاومه للتغيير

قعدنا سنين طويله بنطالب الدوله انها تهتم بملف التعليم و تاخد خطوات حقيقه تجاه التغيير

و لما الدولة ابتدت تنفذ خطة طموحة لتطوير منظومة التعليم فى المصر .. ابتدى الناس يقاوموا عملية التغيير ووصل بيهم الامر انهم بيحاربوها .. الدولة ايقنت بما لا يدع مجال للشك ان الشخصيه المصريه محتاجه انها تتطور واخدت قرار و اقدمت على تغيير منظومة التعليم و قامت باتباع افضل و احدث نظم التعليم فى العالم ..

اوعوا تفتكروا ان التعليم هو كتاب و كراسه و قلم و معلومه لازم الطالب و يعرفها و خلاص ..لا طبعا .. الموضوع اعمق من كده بكتير . التعليم هو بناء شخصيه الانسان ,, و اسلوب و طرق التعليم اللى بيتعرضلها و هو صغير ..هى اللى بتشكل شخصيته لما يكبر ..

بمعنى اننا بنشوف شخصيات غير سوية فى المجتمع و السبب الاساسي فى ده بيكون نظام التعليم اللى اتعرضوله و هما صغيرين ..

مثلا ..انت متعرفش تتناقش مع اى حد فى اى موضوع الا لما يحصل عصبيه و مشادات فى الكلام ..لان كل واحد فينا بيعتقد انه يملك الحقيقه المطلقه و ان وجهة نظره هى اللى صح و باقى وجهات النظر غلط .. الموضوع ده متأصل فى شخصية المصريين و وده بسبب نظام التعليم القديم ..اللى مبنى فكرته على الاجابة النموذجيه اللى هتكتبها فى الامتحان و هتاخد عليها الدرجه النهائيه ..

الاسلوب ده فى التعليم بيخلى كل شخص يعتقد انه يملك الحقيقه المطلقه فى كلامة وو جهة نظره و لا يسمح بوجود اى وجهات نظر اخرى قد تحتمل الصواب ..

من مساؤئ النظام القديم و تاثيره على شخصية المواطن المصرى ..فكرة الملخلصات و الملازم .. غرزت فى شخصيتنا عدم حب القراءه والاطلاع .. ادينى الملخص المفيد و انجز .. مفهوم الفهلوه و جيب من الاخر هو اللى اتعزز هنا فى شخصية المصرى ..شوفتوا بقى ان حاجات بسيطه ممكن متاخدش بالك منها كانت موجوده فى النظام التعليم القديم ..لكن تاثيرها خطير على بناء الشخصيه و ممكن تدمر امة بسبب المفاهيم المغلوطه اللى بتتربي جوانا و بتظهر على شكل سلوكيات كثيرة خاظئه ..

كل ده موجود و بيحصل فى مجتمعنا لحد ما جالنا وزير تعليم عنده رؤيه و ابتدى يقول نقطة و من اول السطر .. “هيا بنا ننسف حمامنا القديم” .. و يا عينى طفحت (انفجرت) فى وشه قنبلة مقوامة للتغيير من مواطنين هما اصلا نتاج نظام التعليم المشوه اللى كنا بنتكلم عليه ..

الراجل رصد المشكله و حط ايده على الجرح و ابتدى يعمل عمليه التغيير .. نظام التعليم الجديد ال (LMS)

( learning management system ) اللى عايز يطبقه الوزير هو نفس النظام اللى بتطبقه المدارس الدوليه واللى اولياء الامور بيدفعوا فيه الاف الدولارات عشان يعلموا ولادهم بيه ..

طارق شوقى عايز يعلم ولادنا باحدث نظم التعليم اللى بيتدفع فيها الاف الدولارات فى المدارس الدوليه..و لكنه واجهة مقاومة شرسه للفكر الجديد بتاعه ..

التحديات اللى بتواجه النظام الجديد فى التعليم هى فكرة مقاومة التغيير ..اولا المقاومة اتت من المواطن اللى هو اصلا كان بيطالب بالتغيير .. و المقاومة ايضا جت من الكوادر التعليميه و المدرسين و هنشرح لكم ليه هما بيقاوموا

اولياء الامور بيقاوموا لان طبيعة الانسان عموما بيخاف من المجهول و كل ما هو جديد .. مشكله نفسيه اسمها الامان المشوه ,, الامان المشوه يعنى ايه ..!؟ يعنى حضرتك بتبقى متاكد ان الشيء اللى بتعمله مليان عيوب و فيه اخطاء و لكنك اتعودت عليها و اتاقلمت معها و بقيت تعرف تتعامل معاها .. فبتحس ان اى حاجه جديده هتدخلك فى متاهاهت انت بتحس انك فى غنى عنها .. اللى هو  المثل اللى دايما بنقوله “اللى تعرفه احسن من اللى متعرفوش ” و الاسهل انى امارس الحياة القديمة بعيوبها بدل ما اعمل مجهود و احاول انى اغير من نفسي ..لان التغيير اكيد هيحتاج مجهود.. و احنا بصراحة اتعودنا على الانتخه و الرحرحه و لما جالنا حد بيقولنا يالا هتشتغلوا و هنعمل مجهود عشان نتغير .. الناس معظمها وقفوا ضده .. دى اول مشكله بتواجهنا وهى احنا كشعب ..

 

المعلمين و المدرسين ..

عندهم مقاومه رهيبه للتغيير لانهم مواطنين من المجتمع المصرى فى الاساس قبل ما يكونوا مدرسين فعندهم نفس مشكلة المواطن العادى .. و هو الخوف من المجهول و لكن ضيف على كده انهم معندهمش استعداد لتطوير نفسهم و اساليبهم لكى تتوائم مع الفكر و الفلسفه الجديده لنظام التعليم الجديد .. برضو رجعنا للامان المشوه .. و فكرة التعود .. و عدم استعداد لبذل الجهد من اجل التطوير .. و نرجع تانى لمبدا “اللى تعرفه احسن من اللى  متعرفوش” ..نفسيا المعلم خايف انه يفشل فى الشغل بالنظام الجديد.. برضو مينفعش امبراطور الكيمياء و ملك الفيزياء يخسروا شعبيتهم و يخسروا زبونهم ..

 

الف شكر و الف تحية لوزير التعليم اللى حط ايده على العيوب و بيحاول يصلحها .. اول وزير يقرر يغير بجد و اللى بيعجبنى فيه انه لا يتاثر بكلام الناس و ماشي فى طريقه

عارفين ليه هو بيعمل كده .. لانه متاكد انه على الحق و انه بينسف الحمام القديم و فاهم ان الناس مش هتحس بالتغيير الا بعد سنوات طويله و اكيد هو كان عارف كم الهجوم اللى هيتعرضله و اكيد حاطت خطة للتعامل مع التحديات دى .. و ده عاجينى جدا و بياكد انه فاهم هو بيعمل ايه …

فلسفة التعليم الجديد

قائمة على فكرة البحث وو ليس الحفظ .. الدراسات اكدت ان الانسان لما بيكون عنده حوافز للبحث عن معلومة معينه بتثبت فى دماغه اكتر و بيتعلم منها اكتر ..عكس لما بيكون هو مجبر على حفظ المعلومه علشان ياخد الدرجات..!

فكرة البحث عن المعلومه بتسمح للطالب انه يتطلع على المعلومه من اكتر من مصدر و متحسروش فى الكتاب و الملزمه ..و ده تاثيره على الشخصيه هايل .. لانك هنا بتعزز فكرة مهمه جدا فى بناء شخصية المصرى و هى ان مفيش حاجه اسمها اجابه نموذجيه و ان الاجابه ممكن تكون مختلفه و تكون فيها افكار مختلفه متنوعه عن نفس الموضوع .. فبتخلق شخص يستطيع استيعاب افكار كتيره متنوعه و مختلفه عن لنفس الموضوع ..فلما تقعد تتناقش مع اى حد بعد ما يكبر و يبقى شخص مسئول و ناضج فى المجتمع  هيلاقى عنده مفهوم جديد هو اتربي عليه .. و هو استيعاب اراء الاخرين و انه ليس صاحب الراى الراجح  دائماو انه ليس  لديه الاجابة النموذجيه التى لا ياتيها الباطل من اى مكان..

 

فكرة الدرجات و التقييم و ديتنا فى داهيه

لان اصبح العلم و المعرفه هى مجرد درجات انا عايز احصل عليها بغض النظر عن المحصلة المعرفيه اللى بيتحصل عليها الطالب .. فتيجى تسال ابنك او بنتك بعد الامتحان ,..هى المادة بتتكلم عن ايه ..فيقولك مش فاكر .. المهم انى هجيب الدرجه النهائيه ! طب ده كلام ..! هو التعليم بقى ان ابنك يقعد يدرس و يحفظ فى معلومات لمدة 15 سنه عشان يجى يقولك بعد الامتحان انا مش فاكر حاجه..

النظام الجديد بيعتمد فى الاساس مش على الدرجات .. و انما على كمية الابحاث اللى هيعملها الطالب و اللى هتتيح للطالب الاطلاع على كم كبير من المعلومات من مصادر متنوعه هتتيح له فرصة انه يٌكوون وجهة نظرة الخاصه عن الموضوع اللى هو بيبحث فيه .. النظام الجديد مفيهوش فكرة الاجابة النموذجيه .. موجود فكرة جديده و هى ان كل الاجابات صح طالما بتتكلم فى الموضوع المطلوب معرفته فى الدرس و المستهدف ان الطالب يعرف معلومات عنه و يستوعبها و يفهمها و يقول وجهة نظره فيها فى الاخر و يقوم بتلخيص كل ده و يقدمه على هيئة بحث .. و اللى هياخد عليه تقييم .. و التقييم هنا مش درجات .. التقييم بيكون ان المعلم بيدرك هل الطالب فهم و عرف المقصد من الدرس والا لا .. لان الفلسفه الجديده للتعليم قائمة على المعرفه وان الطالب يعرف المعلومة و يفهمها .ز بدل ما كان بيحفظها .. الموضوع مش صعب .. و لكنه ما زال تحدى كبير بتواجهه الوزارة .. و ربنا هيكرمهم و يوفقهم فى تحقيقه ان شاء الله

فى النهاية بنطالب المواطن ..انه يتعاون مع الدولة و يحاول يغير من مفاهيمه القديمة عن التعليم و يحاول يبذل مجهود مع اولاده من اجل مستقبل افضل ليهم و من اجل مستقبل افضل لمصر ..

اترك تعليقاً

لن يتم نشر عنوان بريدك الإلكتروني.